القائمة الرئيسية

الصفحات



 #الوسواس_القهري

منبهك رن، صحيت وإنتَ مقرر تروح تزور أهلك اللي بقالك سنين طويلة مشوفتهمش، سافرت، دخلت عليهم، وبدأت تسلم أحضان وبوس باشتياق كبير جدًا، بقالك كتير مشوفتش عمك وعمتك، لحد ما جيت عند ابن عمك، مديت إيدك بعشم وبتسلم، لقيته بعد عنك وبص لك بتقزز وكان باين عليه التوتر، إنتَ بكل تعجب قربت عليه أكتر، مادد إيدك، والكل حواليك بيبصوا على الموقف عاوزين يعرفوا هيخلص على إيه، لقيت نفسك مُحرج، وابن عمك مش عاوز يمد إيده، قومت داخل عليه كده وحضنته علشان تبوسه، لقيته بعدك عنه بكامل قوته وهو قرفان، وراح داخل على الحمام، قلع هدومه واستحمى وغيرها وخرج، الموضوع غريب، ومريب.
ولكن زاد تعجبك لما خرج من الحمام ودخل تاني واستحمى، وخرج، وفضل على الشكل ده أكتر من 5 مرات!
لدرجة إنك مبقتش فاهم، إنتَ مستحمي، وحاطط البرفيوم بتاعك الجميل، وريحتك حلوة، ابن عمك ماله؟ تصرفاته عاملة كده ليه، والموضوع ده فضل شاغل دماغك.
ولما روحت بيتك، ورجعت، قررت تبحث عن اللي حصل وكان غريب جدًا وملوش تفسير منطقي بالنسبة لك، علشان تتفاجئ وتُصاب بصدمة عمرك لما تعرف ان ابن عمك مريض بالوسواس القهري!
-
اضطراب الوسواس القهري "OCD"، مرض نفسي بيتسبب في تكرار الأفكار أو الأحاسيس اللي مش مرغوب فيها، بيكون عندك رغبة تعمل الحاجة كل لحظة، بالإكراه، وإنتَ جواك مش عاوز تعملها، ولكن فيه قوى خارجية متحكمة فيك.
الوسواس القهري ملوش علاقة بعادات زي أكل ضوافرك أو التفكير في الأفكار السلبية، ولكن ممكن يكون فيه هوس في التفكير ما إذا كانت الألوان اللي قدامك حلوة ولا وحشة، والموضوع بيكون متجاوز حد المعقول بمراحل.
لو مصاب بالوسواس القهري هيكون عندك عادة قهرية، ودي بتجبرك على تكرار الشيء اللي إنتَ مش حابب تكرره، زي غسل إيدك 7 مرات مثلًا لو لمست حاجة متسخة!
وممكن تكون أصلًا من جواك عاوز تغسلها مرة واحدة، ولكنك حاسس بالعجز ومش قادر تسيطر على أفعالك.
كل واحد فينا عنده عادات وأفكار بتتكرر أحيانًا ولكننا بنكون عندنا الرغبة فيها وبنعملها بإرادتنا.
لكن الأشخاص المصابين بالوسواس القهري أفكارهم المتكررة بتكون خارجة عن إرادتهم، وممكن يفضل ساعة كاملة بيعمل الشيء ده بدون إرادة منه، ومبيكنش شيء ممتع بل أحيانًا بيكون كاره الفعل ده.
مريض الوسواس القهري بيكون صعب عليه إنه يشتغل أو يكون حياة إجتماعية، يعني حرفيًا حياته متدمرة.
الوسواس القهري له أنواع وأشكال كتير، ولكن معظم الحالات بتكون واحدة من الأربع حالات العامة المنتشرة.
الحالة الأولى اسمها التحقق:
ودي بيُصاب الشخص بوسوسة التحقق من غلق الأقفال أو أنظمة الإنذار أو مفاتيح النور، وأحيانًا بيفكر في إنه عنده حالة طبية معينة زي الحمل أو الفصام!


الحالة التانية التلوث:
المصاب بالوسواس فيها بيكون عنده هوس بالنظافة، وبيكون دايمًا خايف ومرعوب من الحاجات المتسخة، وساعات بيحصل له إكراه على التنظيف! ويفضل ينظف من غير توقف أو تحكم في نفسه.
وأحيانًا الإصابة بتكون عقلية من ناحية التفكير، المصاب فيها بيعتقد إنه اتعامل من المجتمع زي الأوساخ.
الحالة التالتة الهوس والترتيب:
المصاب فيها بيكون عنده هوس لترتيب الحاجات بطريقة معينة، ولو حصل فيها خلل معين ممكن يتصرف بعدوانية وعنف، والأفكار دي بتكون مزعجة جدًا وبيفضل ماشي ملاحظ عدم ترتيب الحاجات وعاوز يتدخل لترتيبها.
الحالة الرابعة الهواجس والإكراه:
فيها المصاب بالوسواس بيكون عارف ومتأكد إن أفكاره دخيلة عليه، ملهاش أي قيمة، ومع ذلك بيعملها، هو مش مستمتع وهو بيعملها، ولكنه مجبر، مش قادر يبعد عنها، ولو كان بيعمل حاجة ووقف في نصها بيحس بشعور الذنب وممكن يبدأ من الأول عادي.
الوسواس القهري بيضم عوامل تانية، زي إن المصاب يخاف على نفسه، أو يخاف على اللي حواليه من الخطر بطريقة مش طبيعية.
أو إنه يشك إن صديقه أو حبيبه مش مخلص وبيخونه، ومهما كان التبرير بيكون صعب يصدقه!
العادات القهرية ممكن تجبر المصاب إنه كل شوية يرتب حاجات بطريقة معينة، وبعدين يغيرها ويرتبها بطريقة تانية، وده بيحصل معاه بطريقة متكررة من غير توقف.
وأحيانًا بيكون عنده شعور لعد الأشياء، يعني يعد خطواته، أو يعد أي شيء بيمارسه يوميًا بطريقة عادية ومستمرة.
والمريض بالوسواس بيخاف من لمس مقابض الأبواب، أو استخدام الحمامات العامة، أو إنه يسلم على حد.
ولكن مع كل الأشياء الغريبة دي اللي ممكن يُصاب بيها الشخص، إيه هي أسباب الوسواس القهري، وإيه عوامل الخطر بتاعته!
الدكاترة مش متأكدين من سبب إصابة بعض الأشخاص بالوسواس القهري، ولكن اللي توصلوا له إن الإجهاد ممكن يخلي الأعراض أسوأ.
والدراسات بتثبت إنه بيجي للستات أكتر من الرجالة، وإن أعراضه بتظهر غالبًا في مرحلة المراهقة أو الشباب.
ومع ذلك الوسواس القهري ممكن يُصيب أي شخص، كبير أو شاب أو طفل.
ومن العوامل الخطيرة اللي ممكن يسببها هي الاكتئاب والقلق والتشنجات اللاإرادية.
ممكن يحصل لشخص صدمة في حياته تتسبب في إصابته بالوسواس القهري، أو ممكن يكون له تاريخ من الاعتداء الجسدي أو الجنسي لما كان طفل، شخص اعتدى عليه سبب له مشاكل نفسية تطورت لأعراض الوسواس القهري.
في بعض الحالات ممكن الطفل يُصاب بالوسواس القهري بعد ما يُصاب بالمكورات العقدية، ودي اضطرابات عصبية ونفسية مناعية بتيجي للأطفال!
لو عندك الوسواس القهري، علشان يتم تشخيص حالتك، الدكتور ممكن يعمل فحص جسدي واختبارات دم علشان يتأكد إن مفيش حاجة معينة في الجسم بتسبب الأعراض دي، وبعدين هيبدأ يتكلم معاك عن مشاعرك وأفكارك وعاداتك!
الوسواس القهري مرض نفسي صعب، وعلاجه أصعب، ولكن ممكن مع الوقت المريض يقدر إنه يتكيف مع الأعراض، وفيه بعض الأدوية والعلاجات اللي بتتاخد بتساعد على الاستقرار النفسي.
أحيانًا بيلجأ الدكتور إنه يعالج المريض من الناحية السلوكية، فبيجبر المريض إنه يتعرض لموقف من المواقف القهرية، ومنها هيحاول يخليه يقلل أفكاره وأفعاله اللي متعلقة بالوسواس القهري ومع الوقت هيتم إيقافها.
الاسترخاء والتأمل واليوجا والتدليك ممكن جدًا يساعدوا في علاج أعراض الوسواس القهري.
فيه أنواع من العلاج بتساعد في تقليل أعراض الوسواس القهري.
فيه حالات نادرة لما العلاج والأدوية مبيعملوش أي فرق، ممكن الدكتور يعرض المريض لأجهزة بتغير النشاط الكهربائي في مناطق معينة في الدماغ.
وده بيحصل عن طريق تعرض المريض لمجال مغناطيسي أو مجال كهربائي.
فيه هواجس معينة لو حصلت لشخص تُصنف من ضمن الوسواس القهري..
زي جمع الأشياء وترتيبها، أو إن المريض يكون مُصر على الاحتفاظ بالحاجة حتى لو مر عليها عشرات السنين، وكتير مبيكنش لها فايدة. ودي عادة اسمها "اضطراب الاكتناز".
ممكن المريض يُصاب بعادة نتف الشعر، وأكله، إنه يشد شعره ويخلعه، وكمان بتوصل الحالة إنه بياكله. ودي عادة اسمها "هوس نتف الشعر".
ممكن المريض يكون مصاب بعادة تقطيع الجلد، إنه يهرش ويقطع من جلده، ودي عادة اسمها "سحجة".
ممكن يحصل للمصاب هوس إنه يظهر رائحة جسمه بشكل مُلفت، سواء كان عن طريق استخدام برفيوم أو أي شيء تاني، ودي عادة اسمها "متلازمة المرجعية الشمية".
ممكن كمان المصاب يعتقد إنه مريض بشيء معين، وهو موهوم، جسمه سليم ولكنه عنده اعتقاد إنه مريض، ودي عادة اسمها "المراق".
من ضمن الأعراض المصاحبة لمريض الوسواس القهري، إنه يفكر دايمًا في مظهره، وبيشوف حاجة بسيطة جدًا إنها وحشة، شكله، لبسه، أو حاجة خلقية، زي إن مناخيره كبيرة أو غيره، ده بيخليه يفكر دايمًا إنه عنده مشاكل في مظهره، ودي عادة اسمها "اضطراب تشوه الجسم".
في النهاية عزيزي القارئ الوسواس القهري مرض نفسي صعب جدًا، ولو قابلت حد عنده نفس الأعراض اللي فوق متحسسوش إنه عنده مشاكل نفسية، تقبله، وتعامل مع الأمر بود وحب، وحاول تلتمس له عذر لو كان قليل الذوق معاك، لأنه مبيحركش نفسه، هو عنده هاجس بيحركه.
وبكده نكون وصلنا لنهاية المقال، واتمنى يكون عجبك.
اللايك والكومنت والشير مش هيقللوا منك حاجة، بالعكس إنتَ كده بتساعدني على الانتشار أكتر وعلى استمراري، فيا ريت تدعمني حتى لو بضغطة زر منك، هتكون عندي كبيرة جدًا.
-
هل اعجبك الموضوع :

تعليقات

التنقل السريع