القائمة الرئيسية

الصفحات

هيروشيما_وناجازاكي..واحدة من أبشع الكوارث والمجازر في تاريخ البشرية، إن لم تكن أبشعهم،



 #هيروشيما_وناجازاكي

البشر عزيزي القارئ أساس كل الكوارث في العالم، المتسببين الأوائل في سفك الدماء وانتشار الموت.
الإنسان كائن متسلط، عاوز يحكم العالم حتى لو بالقوة، الموت الوسيلة المثلى للسيطرة، وانعدام الرحمة والتكبر همَ الأساس.
واحدة من أبشع الكوارث والمجازر في تاريخ البشرية، إن لم تكن أبشعهم، هي موضوعنا النهارده.
-
في 6 أغسطس سنة 1945م، الولايات المتحدة كانت الدولة الأولى والوحيدة اللي استخدمت الأسلحة الذرية في زمن الحرب، وده حصل لما أسقطت قنبلة ذرية على مدينة هيروشيما اليابانية.
مات بسببها ما يقارب الـ80 ألف شخص كنتيجة مباشرة للانفجار، واتصاب 35 ألف تانيين. وما لا يقل عن 60 ألف شخص ماتوا قبل نهاية السنة من آثار القنبلة.
على الرغم من إن إسقاط القنبلة الذرية على اليابان كان يعتبر سبب نهاية الحرب العالمية التانية، إلا إن مؤرخين كتير شايفين إنها تسببت في إشعال الحرب الباردة.
بداية من سنة 1940م، كانت الولايات المتحدة شغالة على تطوير سلاح نووي، بعد ما تم تحذيرها من إن ألمانيا النازية كانت بتعمل أبحاث في الأسلحة النووية.
في الوقت اللي الولايات المتحدة عملت فيه أول اختبار ناجح لقنبلة ذرية، انفجرت قنبلة ذرية تانية في صحراء في نيو مكسيكو في يوليو 1945م، وكانت ألمانيا خلاص اتهزمت، وهتـlـر سقط.
ومع ذلك، استمرت الحرب ضد اليابان في المحيط الهادي وموقفتش.
في الوقت ده رئيس أمريكا كان (هاري إس ترومان)، وكان داخل في حرب مع اليابان، فالمستشارين بتوعه حذروه من أي محاولة حرب ضد اليابان، لأنها هتتسبب في خسائر أمريكية كبيرة، فأمر باستخدام السلاح الجديد علشان ينهي الحرب بسرعة.
في 6 أغسطس سنة 1945م، أسقط القاذف الأمريكي (إينولا جاي) قنبلة وزنها 5 طن على مدينة هيروشيما اليابانية.
تسببت في انفجار يعادل قوة 15000 طن من مادة "تي إن تي"، اللي دمرت 10.5 كيلو متر مربع من المدينة، وقتلت في نفس اللحظة 80 ألف شخص.
وفي الأسابيع اللي بعدها اتوفى عشرات الآلاف بسبب الجروح والتسمم الإشعاعي.


الموضوع منتهاش هنا، (هاري إس ترومان) كان ناوي تكون ضربته قوية جدًا، فبعد 3 أيام، ضرب مدينة ناجازاكي بقنبلة تانية، ودي تسببت في قتل حوالي 60 ألف شخص.
بعد أيام قليلة، اليابان مستحملتش، فأعلنت استسلامها.
في السنوات اللي بعد سقوط القنبلتين الذريتين على اليابان، شاف عدد من المؤرخين إن القنبلتين كانوا لهدفين.
الأول:
من وجهة نظرهم إن القنبلتين أنهوا الحرب مع اليابان بسرعة، وحافظوا على حياة الأمريكان.
والتاني:
إن أمريكا كانت عاوزة تظهر سلاح الدمار الشامل الجديد للاتحاد السوفيتي.
وده لأن قبل القنبلة الأولى "هيروشيما" بأربع أيام، العلاقات بين الاتحاد السوفيتي والولايات المتحدة كانت سيئة جدًا، وفي مؤتمر "بوتسدام" كان فيه تصادم شديد بين الرئيس الأمريكي (هاري إس ترومان) والزعيم الروسي (جوزيف ستالين) و(وينستون تشرشل).
الاجتماع كان عبارة عن اتهامات متبادلة وشكوك بين الأمريكيين والسوفييت، وفي الوقت ده كانت الجيوش الروسية بتحتل معظم أوروبا الشرقية.
(ترومان) ومستشاريه كانوا شايفين إن الاحتكار الذري للولايات المتحدة هيوفر لهم نفوذ دبلوماسية مع السوفييت، وبالطريقة دي اعتبر المؤرخين إن إسقاط القنبلة الذرية على اليابان يعتبر الطلقة الأولى للحرب الباردة. واللي دفع التمن كانوا اليابنيين، بدمائهم وأشلائهم وجثثهم.
الأمريكان كانوا شايفين إنهم ممكن يستخداموا احتكارهم الذري علشان يحققوا مكاسب دبلوماسية.
ولكن سنة 1949م، طور السوفييت قنبلتهم الذرية، ومن هنا بدأ سباق التسلح النووي.
هيروشيما مركز إقليمي مزدحم، وكان يعتبر مركز اتصالات عسكري مهم ومستودع تخزين وقوات عسكرية، ويعتبر منطقة التجمع.
والقنبلة اترمت في نص المدينة، ودي منطقة مزدحمة بالبيوت الخشبية السكنية، ومنطقة عمل.
العوامل دي تسببت في إن عدد القتلى والدمار اللي حصل في هيروشيما كان مرتفع بشكل كبير جدًا.
في نهاية سنة 1945م، الإصابات وأمراض الإشعاع اللي حصلت بسبب القنبلة، تسببت في ارتفاع عدد القتلى لأكتر من 100 ألف شخص.
وفي السنوات اللي بعدها، السرطان والتأثيرات الإشعاعية طويلة المدى تسببت في ارتفاع عدد الموتى بشكل كبير جدًا.
العاصفة النارية اللي سببتها القنبلة دمرت حوالي 63٪ من المباني في هيروشيما بالكامل، و29% اتضرر بشكل كبير.
يعني حوالي 92٪ من المباني في المدينة اتدمرت أو اتضررت بسبب الانفجار والحريق.
عدد الوفيات مش معروف بالظبط، ولكن اللي مات من 100 ألف لـ180 ألف من أصل 350 ألف مواطن.
بعد 3 أيام اترمت قنبلة نووية بلوتونيوم على ناجازاكي من نوع "فات مان"، الساعة 11:02 الصبح، وزنها حوالي 4 طن، واتسببت في انفجار 22 طن.
30% من مدينة ناجازاكي اتدمر، ومات من 60 ألف لـ80 ألف شخص بسبب الانفجار أو الأثار الجانبية طويلة المدى بسبب الإشعاع.
وبسبب الكارثتين دول لحد وقتنا هذا بيتذكروا كتحذير للآثار المدمرة للأسلحة النووية.
تخيل مدينة كاملة تتحول لأموات في غمضة عين، واللي عايش حاسس بزعر وخوف ورعب وماشي يخبط حواليه في وسط الإشعاعات.
الناس اللي نجت من الانفجارات حصل لها أشياء مريبة، زي التسمم الإشعاعي والحروق الشديدة وتساقط الشعر والغثيان والنزيف.
والكارثة الأكبر أن 90% من الدكاترة والممرضين في المدينتين يا إما اتقتلوا أو اتعطلوا أو إن الإمدادات الطبية اللي موجودة خلصت بسرعة.
بعد فترة كبيرة من الانفجارين، الناس اللي نجت كانوا لسه بيعانوا من زيادة في إصابات سرطان الدم، وإعتام عدسة العين، والأورام الخبيثة، وكمان اتشخص كتير منهم باضطراب الإجهاد اللي بيحصل بعد صدمة.
بل إن الإشعاع تسبب في معاناة كبيرة سواء للناجين أو اللي اتولدوا من الناجين أو اللي هيتولدوا فيما بعد، لأن الإشعاع بيسبب صغر الدماغ، وتأخر النمو، والعمى، وزيادة التعرض لسرطان الدم، وأنواع سرطانات تانية.
القصف اللي حصل في هيروشيما وناجازاكي مأساة إنسانية بكل المقاييس.
سنة 2010م اتقدمت وثيقة ختامية لمؤتمر مراجعة معاهدة عدم انتشار الأسلحة النووية، بيطالبوا فيها لأول مرة عدم استخدام الأسلحة النووية بسبب الكوارث اللي بتسببها.
وبعدها كتير من الدول شاركت في نفس المفهوم، ونادوا بحظر الأسلحة النووية.
هيروشيما وناجازاكي أثبتوا إن مفيش ظروف سياسية ممكن تبرر استخدام الأسلحة النووية، غير إن القنابل النووية دلوقتي أقوى بكتير من اللي تم استخدامها في اليابان سنة 1945م.
ده غير إن الانفجارات النووية بتخلف وراها كوارث صعب تداركها، زي انتشار المجاعة، وتدمير المنشآت الطبية والدكاترة والممرضين.
حرفيًا مفيش دولة أو منظمة دولية كبيرة أو صغيرة دلوقتي عندها القدرة على معالجة أو تقديم مساعدة إنسانية وتوفير حماية في حالة انفجار سلاح نووي، ومع ذلك في خوف وقلق كبير من أي استخدام عرضي أو متعمد.
لسلاح نووي.
في وقتنا الحالي، فيه أكتر من 15 ألف سلاح نووي بيهدد العالم، على الرغم من إن غالبية الدول عاوزين يتفاوضوا بخصوص حظر استخدام وتطوير الأسلحة النووية عالميًا!
في النهاية التسلط البشري ممكن يتسبب في كارثة لا يمكن تداركها، بضغطة زر ممكن دولة تختفي من على الخريطة، ومع ذلك فيه دول ما زالت بتستعرض قوتها قدام العالم بامتلاكها سلاح نووي قادر على نسف دول تانية في غمضة عين.
البشر تسببوا في كوارث كتير جدًا من بداية الخلق، وهمَ مش مدركين ولا عندهم استيعاب إنهم مبيتسببوش في الأذى غير لأنفسهم.
للأسف يا صديقي وصلنا لنهاية المقال، اتمنى يكون عجبك.
اللايك والكومنت والشير مش هيقللوا منك حاجة، بالعكس إنتَ كده بتساعدني على الانتشار أكتر وعلى استمراري، فيا ريت تشارك في النجاح اللي ممكن يحصل بسبب ضغطة منك.
-
هل اعجبك الموضوع :

تعليقات

التنقل السريع