القائمة الرئيسية

الصفحات



 شخص روسي راح يعمل عملية إزالة ورم سرطاني من على الرئة، الأطباء اتصدموا لما اكتشفوا إن اللي في الرئة مش ورم، ده فيه شجرة بتنمو جوه جسمه!!

طبيعي إن أي حد يُصاب بسعال، في يوم الشخص ده بدأ يكح، شوية والكحة زادت معاه لدرجة إنه بدأ ينزف قطرات دم، وكان حاسس بألم فظيع في صدره.
فقرر يروح لدكتور علشان يعرف إيه اللي بيحصل له، وبعد الكشف، بقى حالة طبية نادرة وفريدة من نوعها!
بعد ما تم فحص السيد (سيدروكين)، الدكاترة شافوا إنه عنده ورم سرطاني على الرئة، ولازم يستأصلوه.
ولكنهم لما بدأوا في العملية، كانت الصدمة إن الورم اللي طوله 5 سم في رئة (سيدروكين)، هو في الحقيقة شجرة!
(سيدروكين) كان بيشكو من ألم شديد جدًا في صدره، وبيكح دم، والدكاترة كانوا مقتنعين إنه مُصاب بورم سرطاني.
الجراح قال إنه كان متأكد 100% إنه ورم بعد ما عمل الآشعة السينية، وقال إنه مش أول مرة يشوف آشعة لمريض عنده ورم سرطاني، علشان كده قرر يعمل عملية جراحية يستأصل فيها الورم.
ولكنه قبل ما يشيل الجزء اللي فيه الورم، فحص الأنسجة اللي متاخدة من الخزعة، ودي تحاليل بتتعمل لما يكون الشخص مريض سرطان!
الدكتور في اللحظة دي افتكر نفسه مجنون، لدرجة إنه بدأ ينادي الدكاترة التانيين ويسألهم اللي قدامه دي زرعة؟!
الدكاترة قالوا إن سبب نمو الشجرة في الرئة هو إن الشخص ده استنشق بطريقة ما بذرة شجرة تنوب صغيرة، واتسحبت لداخل الرئة، وبدأت تكبر!
وشافوا إن سبب نزيف الدم هي إبر الصنوبر الصغيرة اللي اخترقت الشعيرات الدموية!
(سيدروكين) قال إن الموضوع كان مؤلم جدًا، ولكنه ماحسش بوجود شيء غريب داخل جسمه.
وأضاف وقال إنه مرتاح جدًا إن اللي في جسمه مطلعش ورم سرطاني.
بعدها بدأت حكاية (سيدروكين) تنتشر وبعض الصحف بدأت تتكلم عنه وظهر في الأخبار اليومية الروسية.
الحقيقة الموضوع غريب جدًا، لأن الزرعة علشان تنمو محتاجة تربة صالحة وعملية بناء ضوئي، والخبر غريب بالنسبة لي، ولكن ربنا قادر على كل شيء، عمومًا كالعادة سايب لكم المصدر في آخر المقال.
هل اعجبك الموضوع :

تعليقات

التنقل السريع