القائمة الرئيسية

الصفحات

الموت متجسد في سمكة، قاتل البشر، وحش البحر، ومفترس الكائنات!



 #القرش_الأبيض_العظيم

البحر ملئ بالعجائب والغرائب، ولو تعمقنا فيه هنقعد عمرنا كله بنكتشف في معجزات، وعظمة الخالق بتتمثل في كل نقطة بالكون، وأنا جايب لك النهارده نقطه من عظمته، علشان تعرف إن عظمة خالقك لا يضاهيها شيء.
-
القرش الأبيض العظيم، أو آكل لحوم البشر، أو المؤشر الأبيض، أو الموت الأبيض زي ما أطلق عليه كتير من الناس.
الموت متجسد في سمكة، قاتل البشر، وحش البحر، ومفترس الكائنات!
القرش الأبيض ضخم جدًا طول الأنثى فيه بتوصل من 4 متر لـ6.5 متر، والذكر من 3 متر لـ4.5 متر، ووزنه بيوصل لـ2.5 طن، ويعتبر من أكبر أنواع أسماك القرش اللي موجودة حاليًا، وواحد من أقوى أسماك القرش المفترسة وأكثرها خطورة في العالم.
دايمًا بيكون شرير الأفلام، مفترس البشر في الأفلام، زي فيلم "Jaws 1975"، ولو قابلك في البحر عزيزي القارئ استشهد فورًا وسلم روحك لله.
وبسبب شراسته مش مفهوم عن حياته وسلوكه غير قليل جدًا.
القرش الأبيض دايمًا بيكون موجود في المياه الساحلية المعتدلة عالية الإنتاجية، يعني اللي بيكون فيها أسماك وثدييات بحرية كتير علشان يتغذى عليها، زي سواحل شرق وغرب الولايات المتحدة، وشيلي، وشمال اليابان، وجنوب أستراليا، ونيوزلاندا، وجنوب إفريقيا، والبحر الأبيض المتوسط، ولو إنتَ مش عايش في أي من الأماكن دي عزيزي القارئ يا ريت تحمد ربنا.
أحيانًا القرش الأبيض بيسافر لوحده للبحر أو المياه الاستوائية، ولكن الدراسات بتقول إن معظمهم بيكون في المناطق اللي فيها غذائه البحري.


القرش الأبيض يا صديقي سمكة ضخمة جدًا، وجسمها مدبب، وأنفها حاد، وذيلها قوي واخد شكل هلال، لونه الأساسي رمادي، وبطنه لونها أبيض.
صياد قوي جدًا، مسلح بفك مفترس فيه أسنان كبيرة وحادة ومسنونة كأنها سكين، بل إنها مصممة خصيصًا لتقطيع اللحم وكسر العظام، وحاسة شمه قوية جدًا، ونظره قوي.
الأسماك في العموم دمها بيكون حرارته باردة، ولكن القرش الأبيض عنده نظام دوري معقد بيحفظ الحرارة اللي بتنتج عن تقلص عضلات السباحة، والحرارة دي بتتوزع في الجسم كله وده بيخليه نشيط وسريع في المياه الباردة اللي بتسبب كسل لبعض الأسماك، وبيتكيف بسرعة مع درجة حرارة المياه.
القرش الأبيض عزيزي القارئ سنانه مثلثة ومترتبة في صفوف وحادة، حاسة شمه قوية واستثنائية، وكمان عنده أعضاء بتستشعر الحقول الكهرومغناطيسية الدقيقة اللي بتسيبها الحيوانات.
تخيل إن القرش الأبيض من جبروته ممكن يفترس أسماك القرش التانية عادي وياكلها، وبياكل طيور البحر والقشريات والرخويات، وأسود البحر والفقمات والحيتان الصغيرة، والحيتان الميتة، وطبعًا البشر.
القرش الأبيض اللي لسه مولود بياكل أسماك القرش التانية اللي من سنه، وبياكل الأسماك، ولما بيوصل لسن الرشد بيبدأ ياكل السلاحف والدلافين والحيتان وحيوانات بحرية كتير.
القرش الأبيض ذكي، كتير بيعمل كمين لفريسته ويصطادها بكل سهولة، لدرجة إنه ممكن يستخبى ويفاجئ فريسته بلدغة سريعة بتكون قوية لدرجة إن اندفاعها بيتسبب في خروج الفريسة من المياه، بمعنى يطير في الهوا.
ولو القرش الأبيض انقض على فريسة بيفضل يعض فيها لحد ما يموتها بهجومه القوي عليها.
القرش الأبيض من أكتر الحيوانات خطورة على البشر، لدرجة إنه بيهاجمهم بدون أي مبرر، وهجومه بيكون مميت، وكتير بيقتل سباحين وغواصين وركاب الأمواج والمراكب الصغيرة.
ورغم كده هو عنده مزاج معين لما بيهاجم إنسان، بيعضه عضة واحدة وبعدين يمشي، ومبيرجعش، بيسيبه يصارع الموت.
أحيانًا الإنسان اللي بيتعرض لعضة بينجو، وفي بعض الحالات العضة بتكون كبيرة، فبتتلف الأنسجة والأعضاء وبتتسبب في موت الشخص.
اتعملت دراسة في غرب الولايات المتحدة أثبتت إن حوالي 7% من هجمات القرش الأبيض على البشر تسببت في موت صاحبها.
وفي جنوب إفريقيا معدلات الوفيات بتوصل لـ20%.
وفي أستراليا بتوصل لـ60%.
الباحثين قالوا إن الهجوم على البشر بيكون فضول منه، مش علشان ياكلهم، وده بيفسر تراجعه بعد مهاجمة البشر، والسلطات بتقول إن القرش الأبيض بيهاجم البشر لاعتقاده إنهم فرائس زي الفقمة وأسود البحر.
وفي كتير من الأوقات القرش الأبيض بيهاجم البشر لأنه مش لاقي فريسة ياكلها.
أسماك القرش بشكل عام بتحب تمشي لوحدها، ولكن أحيانًا بيتشاف أزواج ماشيين مع بعض!
تخيل عزيزي القارئ إن صغار القرش الأبيض وهمَ لسه في البيض بداخل رحم الأم، البيض بيفقس لمجموعة معينة مثلًا، ممكن يتغذوا في الرحم على بيض لسه مكتملش نموه، أو ياكلوا إخواتهم اللي لسه مكتملش نموهم!
أنثى القرش الأبيض بتحمل 12 شهر، وطفلها بيتولد طوله متر!
وفي بطن الأم القرش الصغير بياكل أسنانه، علشان يزود الكالسيوم في جسمه.
وأول ما بيتولد الصغير بيمشي بعيد عن أمه ويعيش لوحده ويعتمد على نفسه.
والقرش الأبيض عزيزي القارئ بيعيش عمر طويل جدًا، لحد 70 سنة.
بسبب قوة القرش الأبيض، أعادائه في البحر قليلين، ولكن تخيل يا صديقي، مع الرعب اللي ممكن يسببه القرش الأبيض لأي حيوان بحري أو إنسان، البشر همَ الأعداء الأساسيين له، لأن همَ اللي بيقدروا يصطادوه!
القرش الأبيض معرض للخطر بسبب الإتحاد الدولي للحفاظ على الطبيعة "IUCN" من سنة 1996م. بل إن معدلات الصيد بتشير إلي انخفاض أعداده بطريقة مهولة.
البشر بيصطادوا سمكة القرش الأبيض علشان طعمها حلو، وبيبيعوها في بلاد كتير، وأحيانًا بيصطادوها لحجمها الكبير وشراستها كاستعراض للقوة، وأحيانًا بيتم تقدير أسنانها زي المجوهرات، لدرجة إن فك الأسماك الكبيرة بيتباع بآلاف الدولارات.
القرش الأبيض بيكبر ببطء، غير إن الذكور بتكون قليلة جدًا، وده بيكون سبب في قلة عددها وصعب تكاثرها.
وكان فيه حصاد وده صيد لنوع معين من السمك، تم ضد القرش الأبيض وتسبب في قلة عددهم، وتسبب برضه في سن قوانين حماية ليهم في أستراليا وجنوب إفريقيا وكاليفورنيا، على الرغم من إنهم خطر جدًا على البشر.
حماية القرش الأبيض ممكن يكون ليها فوائد إقتصادية، يعني مثلًا في بلدان معينة ممكن السياح يشوفوا القرش الأبيض عن طريق عرض "غطس سمك القرش" الشهير، وده معروف جدًا، وده بيتم عن طريق غطسك في قلب قفص فولاذ آمن متعلق في المياه، وبتتفرج على الأسماك حواليك.
تخيل نبضات قلبك في موقف زي ده ممكن تبقى ازاي!
الأبحاث بتؤكد إن أسماك القرش البيضاء بتنحدر سلالتها من أسماك القرش المنقرضة "Carcharocles megalodon" ودي أكبر سمكة قرش في السجل الأحفوري، وتعتبر دلوقتي عضو في عائلة القرش العملاقة "Otodontidae".
صديقي العزيز، تخيل معايا مدى قوة القرش الأبيض:
- القرش الأبيض يا صديقي يقدر يكتشف نقطة الدم الواحدة في 100 لتر ماء، ويقدر يحس بوجود الدم على بعد 5 كيلو متر.
- لون جسمه بيساعده على الاندماج والاختفاء مع المياه الساحلية اللي بيعيش فيها.
- القرش الأبيض سريع لدرجة مهولة، ممكن يعوم بسرعة 24 كيلو متر في الساعة!
في النهاية يا صديقي هقول لك نفس الكلام اللي لازم تكون مقتنع بيه 100%، إنتَ صغير جدًا مقارنة بالعالم ومخلوقاته، وهنفضل عايشين مدى الحياة بنحاول نكتشف أشياء أغرب، علشان نتعجب من قدرة الله ووجود مخلوقات زي دي عايشة معانا، لازم تعرف عزيزي القارئ إنك مش لوحدك اللي عايش، لازم تدي فرصة للكائنات الأخرى إنها تعيش، للحفاظ على التوازن البيئي، وعلشان ننبهر دايمًا بعظمة الكون الكبير وخالقه.
وبكده تكون وصلت لنهاية المقال، اتمنى إنه يكون عجبك، ويا ريت لو عجبك متبخلش بالشير، وتفاعل مع المقال بلايك وكومنت علشان يظهر لك دايمًا مقالاتي ومتتوهش في وسط زحمة الفيسبوك، وسواء كنت جديد على البروفايل أو قديم اعمل متابعة وشاهد أولًا علشان يظهر لك كتاباتي دايمًا. وشكرًا لمتابعتك، وماتنساش تشوف أول كومنت.
هل اعجبك الموضوع :

تعليقات

التنقل السريع